شوفت أمى فى المنام

شوفت أمى فى المنام


شوفت أمى فى المنام
شوفت أمى فى المنام






شوفت أمى فى المنام


جاتني أمى في المنام...
وكأنها على كرسى جنبي..
قالتلي فينك يابن بطنى
حتي مستخسر زيارة !؟؟؟
قولتلها في الدنيا يا أمى..
قالتلي دنيتكم خُسارة..!
قولتلها مطحون فى الرحايا
بجري جري الوحش فيها
ومش ملاحق فى النهاية..
قالتلي يابني عيش حياتك...
وارضى ربك وارضى ذاتك
مش هاينفع إلا عملك..
أعمل الصالح تملي..
زكِّي يابني..
صوووم وصلي..
وخلي فعل الخير أمامك 
خلي ذكر الله تملي فوق لسانك...
ادعي يابني ف كل لحظة
مش عشاني ...لأ.. عشانك
دا الدعاء هايعَلي شأنك..
واوعى يابنى من الحرام
أو يدخل جوفك حرام
او يدخل جيبك حرام..
قولتلها حاااضر ..طمنينى.
اشحاله قبرك!!؟ 
ظل وظليل وللا حرور. !!؟
قالتلي يابني كله نور
أد إيه ربك رحيم 
أد إيه ربك غفور
كنت رايحاله وشايله
فوق كتافي ألف ذنب..
بس كان جوايا قلب..
ابدا ماكان كاره لحد .
ربنا  رحماته أوسع 
مما يتصور خيالك..
ابتسمتلها بسعادة
وقلت يا أما دي مكتوبالِك..
زيديني يا أما في النصيحة..
قالت:.. هاقولها لك صريحة:
اوعي يابني ف مرة تظلم
أو تكون أداه لظلم..
انصف المظلوم تملي
وخلي قلبك فاضى ظلم..
وخللي يابني بالك من ابنك..
قل له ستك فرحنالك
وبلغه النصحية ديت :
قل له خد بالك من أمك 
عشان تشوف بركة عيالك..
في رضاها السعد يابني..(يابن ابنى)
مهما تِعلا ولا تبني
خلى بالك من خواتك 
هما دول مالك و زادك
هما دول هما امتدادك..
قولتلها يا أما نفسي أجيلك من زمان..
قالتلي يابنى كله بأوان
كل واحد له أوان 
بالمكان .. وبالزمان..
رحت وااخدها فى حضنى
كنت بعملها زماان..عشان انام..
صحيت على صوت الأذان .
قمت صليت فجر يومى..
ودعيتلها خلف الإمام..،،،
شوفت أمى فى المنام
من حلاوة الحلم نفسي
أروح ومن تاني.. أنام ..
عشان أشوفها فى المنام،،

إرسال تعليق

أحدث أقدم